Нарӑсӑн 15-мӗшӗнчен пуҫласа ака уйӑхӗн 15-мӗшӗччен республикӑра «Эпӗ пӗчӗкҫӗ чӑваш» сӑвӑ вулакансен видеоконкурсӗ иртет. Конкурса чӑваш чӗлхин инҫет вӗренӳ центрӗ тата Чӑваш халӑх сайчӗ пуҫарнӑ. Унта шкул ҫулне ҫитмен тата пуҫламӑш классенче вӗренекен ачасем, вӗсен ашшӗ -амӑшӗсемпе педагогсем хутшӑнма пултараҫҫӗ.

Конкурсӑн тӗллевӗ: чӑваш чӗлхине аталантарасси, ачасене мӗн пӗчӗкрен тӑван чӗлхе илемне туйма вӗрентесси, хӑйсен пултарулӑхне аталантарма хӑнӑхтарасси. Конкурсра пурӗ 7 номинаци йӗркеленӗ:

• «Пукан ҫинче» (4 ҫул ҫурӑран кӗҫӗнреххисем);

• «Шӗвӗркке» (4,5 ҫултан аслӑрах, шкул ҫулне ҫитеймен арҫын ачасем);

• «Пукане» (4,5 ҫултан аслӑрах, шкул ҫулне ҫитеймен хӗрачасем);

• «Шӑпӑрлан» (пуҫламӑш классенче вӗренекен арҫын ачасем);

• «Чиперук» (пуҫламӑш классенче вӗренекен хӗрачасем);

• «Сӑпка умӗнче» (аслисем хушшинче);

• «Чи лайӑх видео» (видео пахалӑхӗ тӗлӗшӗпе).

Конкурса хутшӑнакансен шкул ҫулне ҫитмен тата пуҫламӑшри класра вӗренекен ачасем валли ҫырнӑ е ача-пӑча сӑмахлӑхӗнчен илнӗ сӑвва пӑхмасӑр видеокамера умӗнче вуламалла, ӗҫсене видеоконкурса ярса памалла. Конкурса Елчӗк ялӗнчи «Хевел» ача  садӗнчи  ачасем те хастар хутшӑнчӗҫ.  Ульяна Иванова, Ульяна Патшина, Ульяна Шашкова, Алиса Антонова, Мисякова Виктория хайсен саввисемпе куракансен кӑмӑлне каясса шанас килет пирӗн.